政情：梁栢賢再談疫情 囑回流生認真隔離
醫院管理局前行政總裁梁栢賢（PY）早前喺Facebook（Fb）發火，話有好多專家不負責任，屢次錯估疫情，叫錯估疫情嘅專家有錯就要認。但結果近日本港肺炎確診人數又不斷攀升，PY三日內以疫情短評為題喺Fb連出五篇貼文，評論本港疫情發展，仲話依家真係考驗年輕人嘅時候，叮囑回港學生認真做好自我隔離，避免新一輪大爆發！
PY早兩日喺Fb貼文，提到近日歐美淪陷，確診個案繼續上升，仲話英國要經濟唔要人命嘅放任政策，會令個案短期爆升，對香港風險最大，預計跟住呢幾個星期，唔少學生會陸續返嚟，絕對要做好防護措施咁話。
話真正考驗年輕人嘅堅毅
點知話口未完，PY又貼文話有好多回港學生因有流感症狀，喺機場檢疫中心等候送院檢查，但因人數眾多，醫護人員未能及時通知家人添，提醒回港人士要認真做好自我隔離，避免家人朋友受感染。佢仲話今次係真正考驗年輕人堅毅嘅時候，同埋要忍耐隔離嘅寂寞，避免新一輪群組大爆發。