政情：被指公帑飲花酒 楊彧耍手兼擰頭
「點錯相」嘅後果可大可小，隨時令人水洗都唔清。話說尋日喺社交媒體出現咗一條嫖妓短片，片段簡介就寫住「深水埗區議會主席（楊彧）在台灣飲花酒、拿着公費吃喝玩樂」，隨即被大量網民轉載兼引起熱議，唔通身為公職人員又結咗婚嘅楊彧真係咁唔檢點，拎住公帑飲花酒？
睇真啲，片入面的確有個男人畀錢飲花酒，旁邊仲有個性感女郎搭住嗰個男人嘅膊頭，但嗰個男人嘅臉形同五官完全唔似楊彧，共通點應該只係兩人都係短頭髮同戴眼鏡，不過有啲街坊可能睇完簡介已經發晒火，大鬧楊彧亂嘥納稅人嘅血汗錢，唔配再做區議員咁話。
大方承認鍾意「玩女」
楊彧其後喺Facebook「現身」回應話：「我當堂嚇一跳，然後就得啖笑。」佢話知道自己唔係幾出名，所以其他人唔認得佢都唔奇，但如果短頭髮、眼細細兼戴眼鏡嘅就係楊彧，咁全港應該有好多個「楊彧」咁話。不過，佢最後都大方承認自己好鍾意「玩女」，但就係佢十四個月大嘅囡囡喎。