政情：羅致光講嘢一舊舊 聽到𢱑晒頭
政府統計處日前公布最新失業情況，舊年十二月至今年二月經季節性調整失業率上升至百分之三點七嘅高位，創九年新高。勞工及福利局局長羅致光其後就評論話，勞動人口嘅跌幅都同時擴大，顯示部分人士喺失去工作時選擇離開勞動市場喎，搞到班工友抓晒頭，工聯會就喺Facebook（Fb）貼文同圖，寸羅致光IQ（智商）高，但完全唔明佢嘅邏輯，仲話離開勞動市場，咪即係失業囉！工聯會理事長黃國暗寸羅講嘢一舊舊，誤導打工仔。
評論失業古怪邏輯 唔知諗乜
疫情對多項經濟活動構成嚴重干擾、削弱經濟氣氛，勞工市場急劇惡化。根據政府統計處公布，最新失業率為百分之三點七，創九年新高，失業大軍較上期急增超過一萬人，達十三萬四千多人，就業不足率亦上升零點三個百分點，至百分之一點五的五年高位。至於總就業人數嘅按年跌幅則擴大至百分之二點五，係亞洲金融風暴以來最大嘅跌幅，即係話失業大軍已經湧現。
但點知，羅致光就話勞動人口跌幅擴大，係因為有人失去工作時，選擇離開勞動市場。此話一出，工聯會就喺Fb貼文，話一班工友對局長嘅邏輯表示不解，認為失業即係「手停口停」嘅意思，又話有邊個想離開勞動市場o架！鬧爆羅致光IQ高達一百六十，大家完全讀唔懂佢個腦袋喎。貼文仲提及工聯會成立嘅緊急失業慰問金早前開始接受申請，去申請嘅工友都表明最希望可以盡快搵到工作，養活自己咁話。即係唔想離開職場喇！
用詞複雜 黃國寸誤導打工仔
工友唔明羅致光噏乜，但係黃國就話明白工友嘅疑問，仲話政府官員應該用啲一般打工仔明嘅說話講嘢，唔好將啲學術詞語複雜化，失去工作而退出勞動市場，咁都係失業啦，想要同市民有良好溝通，就要用「一般字」啦，暗寸羅致光講嘢一舊舊，喺度誤導打工仔。
反修例風波持續逾九個月仍未平息，再加上新冠肺炎疫情肆虐，重創本港經濟，雖則政府推出三百億元嘅防疫抗疫基金，紓緩各行業嘅困境，但係都止唔到血，失業率只會繼續飆升，正如工聯會都提醒政府要正視嚴重嘅失業問題，積極同盡早提出解決辦法，紓解失業大軍嘅困境，唔好搞咁多語言偽術喇！