中環出更：全城嗌外賣 王嘉恩憂致環保大災難
香港好多「無飯家庭」，幾乎一日三餐都靠出街解決，然而疫情之下大家都深居簡出，嗌外賣就成為祭五臟廟最方便嘅途徑。香港國術總會會長王嘉恩話食肆為咗方便食客，外賣餐飲例必附送一次性餐具。依家全城抗疫，好多人為減低染疫機會而選擇叫外賣，大量一次性餐具用完即棄，勢必造成環保大災難。
王嘉恩話依家人人必備嘅口罩，其製造材料含有不織布，就係一種極難分解嘅物料，全城幾百萬人日日都要更換口罩，對環境傷害之大可想而知。不過，按目前嘅情況，始終都係大眾嘅健康為首要，惟有待疫情過後再諗吓環保方面嘅補救措施。儘管目前抗疫高於一切，但佢認為並唔代表咁就可以漠視環保，所以佢尋日聯同香港菁英會向石硤尾邨街坊派發嘅抗疫包，裏面唔單止有口罩同搓手液，仲有一套環保餐具，佢話希望大家嗌外賣嘅時候，要求店方唔使提供一次性餐具，以減少塑膠廢棄物。
前港隊武術代表陳頌天亦有出席派發防疫包嘅活動。佢話每日嘅飯餸都係父母煮嘅，唔使叫外賣咁話。不過講起飲食，佢自爆一件體院昔日嘅趣聞，話運動員嘅餐單雖然都經過悉心安排，但由於烹飪係好多女士嘅嗜好，於是有女生喺宿舍內玩真實嘅煮飯仔，爐具升起嘅煙霧觸動感應器，引致女生宿舍警鐘大鳴。
馬家強準備帶囡囡去露營
香港菁英會副秘書長馬家強，繼早前趁住停課期間，同八歲嘅囡囡行完全長一百公里嘅麥理浩徑之後，下一步就打算同囡囡露營兼野外煮食，諗住炮製古法窰雞同煎牛扒，當然唔少得囡囡最心愛嘅蒜蓉多士喇！為咗要食得豐盛，馬家強買咗個容量高達七十公升嘅背囊，咁先至裝得下大量嘅裝備同物資，佢話能夠兩父女一齊享受野外生活，孭重磅都冇所謂啦！
卓妮