政情：音樂噴泉冇得撤 民主派疑威脅拆檔
觀塘區議會尋日開會，討論上屆區議會已拍板興建嘅觀塘海濱公園音樂噴泉工程事宜，雖然出席嘅官員已明言音樂噴泉工程已展開，今年第四季將進行測試同嘗試運行，明年中完工，唔存在撤回嘅可能。不過一班民主派區議員就繼續玩嘢，仲質疑音樂噴泉可能會好似早前智慧燈柱咁，喺示威中畀人拆咗落嚟喎。佢哋咁講，係咪又想用暴力示威威脅政府呢？
質疑會步智慧燈柱後塵
尋日有議員喺會上批評政府無視當區區議會一月通過嘅暫緩音樂噴泉工程嘅決定，企硬進行工程，其中區議員李嘉達就對與會嘅民政事務總署助理署長鍾雅之窮追猛打，又話去年區議會選舉投票率係有史以嚟最高，政府不應無視最有代表性嘅區議會聲音，認為如當局唔聽民意，市民只會直接喺街頭反映怨氣，質問政府係咪唔怕音樂噴泉會好似智慧燈柱咁，畀人拆咗落嚟。
鍾雅之話，要尊重上屆區議會嘅決定，起音樂噴泉係勢在必行，並唔存在撤回嘅可能，並強調面對所有破壞公物嘅行為，警方都必定會嚴正執法。