政情：餐廳唔招待內地人 朱敏健話涉歧視

確診者大多數本地居民

朱敏健話，新冠肺炎衍生不同層面嘅歧視現象，包括有餐廳話為咗保障其他食客嘅安全，拒絕招待內地人或講普通話嘅人。但佢質疑有關措施實質並無用途，仲話餐廳嘅做法係假設咗所有內地客人都可能染上新冠肺炎，有機會構成殘疾歧視添！佢仲話餐廳拒絕招待講普通話嘅人，而冇拒絕招待包括講英文、法文嘅人士，而大部分講普通話嘅都係華裔人士，所以亦有可能違反《種族歧視條例》。

有人認為平機會站在道德高地批評餐廳，亦有評論員指平機會「昧於現實、近乎虛偽」，朱話絕對唔同意。朱話明白市民對疫情憂慮，但截至三月中，感染新冠肺炎嘅大多數係香港居民，由此可見，不招待內地人嘅措施並非合理需要。最後，朱話大家都係地球村嘅一分子，呼籲擁抱種族多元化、推動種族平等。