政情：口罩廠終於開幕 林健鋒感觸落淚
新冠肺炎疫情持續蔓延，口罩供應仍然短缺，政商界都有發起開設本地口罩生產線。身兼行政會議成員嘅商界（第一）議員林健鋒（Jeffrey）牽頭嘅口罩廠尋日開幕，佢話依家暫時得兩條生產線，月內會加多兩條，料下月中第五條生產線都會開動，希望屆時可以每日生產五十萬個口罩。不過佢講講吓竟然眼濕濕，咩事令佢咁感觸呢？
Jeffrey話佢哋口罩嘅原材料都合乎規格，不過口罩都係要送去檢驗，之後先可以推出市場，希望今個月內可以畀市民買到。口罩供應緊張，價格亦隨之上升，佢就話口罩原材料價格都好飄忽，但佢哋唔想隨意調整口罩價格，所以決定定價一個九毫半一個。
感激廠佬支援生產線
Jeffrey又提到佢同四個口罩廠董事合共攞咗逾一千萬元出嚟投資。被問到間廠係咪會長期營運，佢就突然哽咽。
佢解釋因為一班廠佬好務實，知道香港唔夠口罩，就即刻獲各方支援設生產線，所以覺得好感動喎。