中環出更：口講重視 港府又走寶 理大科研投內地懷抱
政府成立基金資助創科產業，但唔少初創企業都因申請門檻太高，紛紛打退堂鼓。香港理工大學上月公布最新研發嘅呼吸道傳染病快速測試系統，可以喺一個鐘內檢測多達四十種病原體，點知聽落咁把炮嘅研究竟然不獲政府資助，搞到研究團隊要靠深圳市政府注資先可投產。有議員批評政府冇慧眼「走寶」，變相為他人作嫁衣裳。
用公帑為他人作嫁衣裳
話說立法會工商事務委員會尋日開會，講到政府對創科產業支援不足。議員胡志偉質疑政府唔識把握良機，將理大嘅研究成果拱手相讓，日後如要喺深圳買番試劑，就間接增加咗檢測成本，同用公帑為他人作嫁衣裳冇分別。
議員黃定光亦話，本港幾間大學都有唔少享譽全球嘅研究，但政府對大學研究成果商品化一直冇乜支援，唔覺政府有幾重視科研囉。創新及科技局局長楊偉雄竟然仲好意思話，鼓勵被拒嘅申請者再接再厲，強調有獨立專家小組審視申請，又稱創科要互相合作先有進步，所以好歡迎內地資金「過河」喎。
政府如果再不知悔改，趕走晒有潛質嘅科研項目，真係唔知本港創科市場仲有咩吸引力喇。
卓妮