中環出更：網上拜山避染疫 潘國山：心意最重要
清明時節唔少市民都會去拜祭先人，但因應新冠肺炎疫情，政府就呼籲市民避免集中於正日掃墓，甚至可考慮善用科技網上拜祭，減少感染風險。公民力量主席潘國山都有喺清明時節慎終追遠嘅習慣，不過佢就通常都係喺清明節前後一兩個星期去拜祭，認為可避免人多擠迫之餘，亦可減低感染疾病風險。對於政府倡議網上拜祭，佢就認為任何形式都可以，因為都係悼念先人表達心意。
潘國山當日其實係出席一個防疫大掃除活動，同場仲有公屋聯會主席文裕明同總幹事招國偉。文話，每年清明都會拜祭先人，但今年都要同兄弟姊妹再商量，或揀啲人流較少嘅日子先去。問到會唔會考慮電子拜祭，佢就話科技發展係好嘅，但佢覺得始終都係習慣咗親身去拜祭，幾兄弟姊妹亦可聚一聚，因為平時都各有各忙喎。不過文都話，乘搭交通工具時會小心啲，注意個人衞生。
招國偉遲啲先祭祖
去拜祭先人都會準備祭品，文就話，一般都係買啲鮮花同先人生前鍾意食嘅嘢，拜祭完之後，一家人都會食啲祭品先離開，唔好嘥咗啲食物咁話。招國偉就話，佢今年都會去祭祖，冇考慮過綠色拜祭，認為時間安排可彈性啲，就算遲些少先去都得，因為有心唔怕遲，最緊要係對先人有敬意。轉頭又見到工聯會陳穎欣，陳就話自己時間好難遷就，因為過時過節通常都要落社區同街坊一齊過，所以好少約埋屋企人一齊去拜山，認為最緊要都係表達到心意啫。
卓妮