政情：婦女政策淪空話 嫻姐批制度僵化

尋日有一個由婦女事務委員會資助、社福團體主辦嘅頒獎禮，呢個計劃係教婦女做烘焙，希望幫助佢哋重投社會再就業，嫻姐喺活動上話好多機構教識婦女烘焙同做手作，但就批評咁樣並唔足夠，因為更大問題係欠缺市場賣呢啲成品。佢話一直希望恢復番以前咁，婦女可透過小買賣幫補家計，但政府自八十年代尾開始唔畀人喺街邊擺賣，條街的確係乾淨咗，但就乾淨到連呢啲本土第三產業都冇埋，就算婦女學識咗一技之長都無辦法好好利用。

部門間多框框 措施難落實

現屆特首當年喺競選期間都有提出墟市政策，但其後冇影。嫻姐話民間一直畀咗好多意見政府，又重提自己喺二○○三年失業率高嘅時候，建議政府喺黃大仙搞「騰龍墟」，但搞咗一次，當經濟回復好轉之後，政府就無咗件事，批評政府只重視地產，完全唔重視其他元素嘅經濟，反指喺台灣、澳門同其他地方都有市場畀婦女賣小手作。

唔單止生計問題，嫻姐仲話之前同唔少局長傾過，希望能夠引入乳癌、子官頸癌社區普查，而食物及衞生局局長陳肇始都同意推行，但更大問題係點樣落實。佢批評政府其中一個死症係部門同部門之間有太多框框，唔同嘅局啲錢調過嚟亦係問題，因為即使食衞局肯畀錢，若果過唔到勞工及福利局嗰關，咁點辦呢？

再促政府撥10億 推動墟市

雖然嫻姐亦話勞福局局長羅致光都願意做，但就坦言「今次做咗兩年幾婦女事務委員會，更深刻體會政府出現咗咩問題」，指政府制度僵化，部門要突破框框一向難過登天，「發展咗咁長時間以為自己有一套嘢，實際全部都好官僚，好多時市民覺得佢哋離地就係咁解」。

嫻姐話婦女事務委員會上年已建議陳茂波撥十億元，畀民間團體協助推動墟市同婦女健康嘅婦女政策，但政府並冇採納，所以今年會再重提。佢亦叫多啲人批評婦女委員會，咁樣先可有多啲壓力叫政府做嘢，仲提到自己學識咗要書面向相關政策局反映問題，等佢哋唔能夠話唔關自己事。