中環出更：衞署印章倒轉 教局認衰話技術問題

近排湖北武漢不明肺炎原因未明，但疫情持續蔓延，而香港都收到由武漢返港出現疑似肺炎症狀嘅個案。早幾日衞生防護中心就喺網上出通告，內容主要係交代武漢市嘅情況，又呼籲如果學校、院舍、機構嘅學童或者工作人員出現發燒同呼吸道感染嘅情況，就應該立即戴口罩同求醫，仲建議要注意個人衞生。

被嘲扮「福到」 同市民拜年

但係最後，張竹君醫生代衞生防護中心總監簽署，點知個印章就倒轉咗，仲畀市民笑「咁都可以倒轉」。唔知衞生署係急過頭「擺烏龍」，定係提早扮「福到」，順手同市民拜年呢？

我哋向衞生署查詢呢件事，衞生署回覆話「留意到教育局上載至其網頁的信件印章方向與原函有分別，已通知教育局跟進。」之後我哋亦問番教育局，而教育局回覆話「相信是因技術問題所致，本局已作出修正」，即係知衰啦！

但我哋追問點解印章會倒轉，希望局方提供詳細情況，教育局就避而不談喎。所以究竟係乜嘢技術問題，可以淨係倒轉個印章呢？最後都無從得知嘞！

卓妮