中環出更：亂局影響班主投資 貝鈞奇：難保球員唔減薪
香港喺過去半年立立亂，各行各業都大受打擊，有啲仲預計喺農曆新年過後結業添！當中，零售業、旅遊業同飲食業營業額受挫，但係唔講唔知，原來體育行業都受到好大影響。香港足球總會主席貝鈞奇話旺角大球場本身稱為「旺丁場」，但依家咁亂嘅時勢，都冇乜人有心情去睇波啦，加上班主嘅投資意欲低咗，都會影響球員嘅薪金o架！
貝鈞奇話○三年沙士嘅時間，足球員都試過減薪，平均足球員一個月得幾千蚊人工。另外，政府喺○四年亦都推出過足球員學徒計劃，每個報名嘅足球員都係得四千蚊人工，但佢話人工少唔代表咗資質差，其後呢班足球員就喺○九年代表香港出戰東亞運，最後仲拎到冠軍添！
王賢訊指慈善團體要積穀防饑
至於足球員嘅人工方面，貝鈞奇話暫時冇減人工，但現時好多班主嘅投資意欲低，下年嘅投資額自然就會少咗，所以都好難確保一眾足球員嘅人工下年會唔會受到影響啦！不過，佢話有足球員就選擇返內地踢波，咁嘅環境底下都難免有人才流失。
唔止體育界有影響，連慈善團體都話今年要積穀防饑。仁濟醫院主席王賢訊話，面對外憂內患嘅情況，仁濟大致上穩定，冇零售業影響咁大。但佢預料今年市道會更差，所以過時過節都會冇咁「鋪張」啦，仲話要積穀防饑，有乜嘢事都安心啲。佢仲話今年多個國家有大選，香港又有立法會選舉，覺得不穩定因素太多，但有善長仁翁嘅支持，今年仁濟嘅恒常活動都唔會受到影響嘅，但佢啲生意就要投石問路、見步行步啦！
喺電子產品公司擔任高層嘅中西區區議會前主席葉永成話，香港前景唔明朗，依家公司啲用戶已開始對香港信心下跌，訂單都少咗，所以公司已將工廠遷到內地。
至於人工方面會唔會喺今年有所調整？佢就話要睇大環境嘅趨勢，但就話依家嘅員工福利唔會縮水。
卓妮