中環出更：聖誕開P 沈運龍急學打鼓獻技

Aaron喺Facebook（Fb）上載咗好多開派對嘅相，亦都貼文同大家分享當晚嘅開心點滴，佢自爆打鼓只係學咗幾個星期，當晚就即場獻技，仲話希望唔好笑死大家，亦希望朋友嘅獻唱可以補番數，唔好難為咗大家喎。睇嚟大家都冇嫌棄，仲有朋友留言話日後搵埋佢夾band，一齊去義唱添！

話時話，佢不斷刷新世界紀錄，已經攞咗十個健力士紀錄，分別係鑲嵌最多鑽石嘅唇膏盒、鑲嵌最多寶石嘅結他等，唔知會唔會諗吓做個鑲嵌最多鑽石嘅鼓呢？不過，話口未完，佢就話當晚開咗三十支酒，呢個可能係喺屋企嘅新紀錄，當中包括開咗支1967年嘅珍藏佳釀，佢亦特別提到嗰年發生六七暴動，又祝願希望香港快啲平安。

楊偉誠夫婦喜與好友聚頭

西九戲曲中心顧問小組主席楊偉誠同太太、資深歌手張德蘭，經常都係拍拖出席活動，日前都同朋友一齊開Party，仲話同好朋友相聚最開心。本來就「四眼」嘅楊偉誠仲戴多副鹿角眼鏡同太太襯番添！

楊偉誠同太太張德蘭一齊戴上鹿角眼鏡，好襯。

家人送上蛋糕為蕭偉強（前排中）預祝生日。

蕭偉強提早慶生 簡單平安

勞工及福利局前局長蕭偉強亦喺Fb上載咗幾張相，貼文話喺冬至當晚，家人預祝埋佢生日，仲話難怪冬至都咁溫暖。事關平安夜亦係佢嘅六十三歲牛一。佢話收到兒媳送嘅生日蛋糕，女兒送嘅超級防水透氣旅行戰衣，仲有太太動用佢嘅不動產結帳，事關家中開支帳目，太太嘅係不動產，佢嘅先係流動資金喎。

反修例風波持續咗逾半年都未平息，佢都有感而發話：「生活說到底就是這麼簡單，愛是根本，也是希望！在冷峻的氛圍，香港正要回到這個根本，需要這個希望！」

卓妮