中環出更：劉健儀：功能界別至考真材實料
民主派一直要求取消立法會功能界別，航運交通界前議員劉健儀早前喺一個晚宴上為功能界別辯護。佢首先大鬧喺現行制度下「立法會議員係好無用」，仲特別提到直選議員可以同市民講啲虛無縹緲嘅嘢，相反功能界別嘅議員先至係考緊真材實料。
制度局限政治人才發揮
劉健儀先提到香港無政治人才，就算有都唔可以喺制度內發揮。佢話香港嘅政黨規模同外國無得比，即使最大黨都只有萬幾名黨員，唔似得外國政黨可以有系統同資源針對公共政策做研究。佢亦提到自港英年代開始，行政主導方針一直局限議員能夠發揮嘅職能，回歸後限制議員議案更加令到班議員「連彩都無得攞」！
不過，有二十四年議會經驗嘅劉健儀評價自己時，就覺得自己幾有用，仲特別用的士燃料做例子去解釋。佢提到回歸前末代港督彭定康喺英國帶咗一項環保提案嚟香港，計劃將的士由燒柴油轉做汽油，用每升減兩毫吸引市民支持。不過，佢就專程去日本取經建議轉用石油氣，逼到政府參考並且喺二○○○年實行，佢仲強調立法會議員應該係要搵出問題嘅解決方法！
卓妮