政情：公民講場：賴無廁所谷出怨氣 石禮謙齋噏當秘笈

立法會政府帳目委員會尋日就審計報告中有關食物環境衞生署規劃、設置同管理公共廁所嘅工作進行聆訊，作為帳委會主席嘅地產及建造界議員石禮謙（大舊石）就質疑署方興建公廁時因為有人反對就唔做，仲話「點解社會咁多怨氣，當佢哋有啲時候去唔到廁所都好大怨氣」喎。眾所周知，社會之所以有咁多怨氣同房屋、地產霸權等脫不了關係，其中住屋問題可以話係最嚴重問題之一。政府早前推一手樓空置稅，大舊石同一班既得利益者就反政府，所以話大舊石都係造成社會怨氣其中一人就真。依家佢話啲人去唔到廁所好大怨氣，真係噏得就噏。