政情：八網難逃：袁嘉蔚唔夠「素」捐唔到血
血庫近年經常告急，踏入冬季天氣轉冷，更加係捐血淡季。南區區議會候任區議員袁嘉蔚（Tiffany）呼籲街坊捐血救人嘅同時，前日就身體力行自己走去捐血，點知就捐唔到，究竟點解呢？
Tiffany日前去香港仔社區中心捐血，不過就捐唔成，原來係因為佢嘅血紅素唔夠，所以就冇得捐血喇。佢仲自爆自己係一個隱性地中海貧血患者，雖然係咁，只要血紅素指數達標，再同駐場醫護人員交代好身體情況，都一樣可以捐血嘅，只不過佢尋日就唔達標，惟有再等下次喇。
可預早攝取鐵質
有網友就話同Tiffany一樣，血紅素都唔達標，提議佢喺捐血日前休息多啲同注意飲食，攝取足夠鐵質，如食多啲牛肉、菠菜等，就可以提升血紅素喎。另亦有網友建議Tiffany同紅十字會輸血服務中心商討，希望可以喺周六、日都舉行捐血日，咁就方便街坊，唔使喺返工日子趕去捐血咁話，相信呢啲意見Tiffany都收到喇。