政情：潘佩璆：港集體陷自殘情意結
近半年香港立立亂，好多年輕人紛紛上街遊行示威表達不滿。作為醫院精神科顧問醫生嘅前立法會議員潘佩璆，就話香港陷入「自殘情意結」，唔明白點解咁多港人咁憎自己嘅國家，想國家被外國勢力毀滅，甚至搞到家破人亡，亦無辦法明白點解咁多港人會去支持嗰啲想整死香港嘅人，背棄服務街坊幾十年嘅區議員，選一啲對地區工作一無所知嘅人，佢話全世界都未見過咁樣嘅集體自殘，最終要靠港人自己覺悟。
以父子故事比喻中港情況
潘佩璆喺社交網站發貼，分享一個好可悲嘅父子故事來比喻香港自殘情況。話說有一個人好憎爸爸，覺得要殺死爸爸先安樂，但佢冇咁嘅能力，於是周圍搵人幫手，其中有個人欠佢爸爸好多錢，於是送把刀畀佢，仲話佢爸爸係一個十惡不赦嘅大奸人，所以絕對支持佢殺咗爸爸。不過，佢爸爸好功夫又眉精眼企，一手搶咗把刀，主角見殺父不成就開始自殘，要令爸爸難過，但爸爸就由得佢作賤自己。