政情：搞墟市前一日先批准 李大成鬧爆政府
政府嘅墟市政策一直為人詬病，唔止冇長遠嘅推動墟市政策，團體申辦墟市嘅程序亦非常繁複。尋日團體申辦墟市搞到一肚氣嘅情節又再上演，有份籌辦社區墟市嘅關注綜援低收入聯盟組織幹事李大成大鬧民政事務總署同地政總署行政失當，搞到墟市被迫縮減規模，兩部門仲要喺活動舉行前一日下午先批准團體使用其中一塊用地，令團體大失預算咁話。
經七部門審批 拉鋸兩星期
有關團體尋日起一連兩日喺美孚橋底舉辦社區聖誕墟市。李大成話，佢哋原本諗住申請用晒橋底三塊相連用地，但中間塊地就因地政署租咗畀另一團體搞農墟，所以用唔到。佢哋曾同租用農墟嘅團體溝通，對方都願意借出用地，但地政署最後都因合約上嘅字眼問題，唔容許佢哋用。不過，令到佢最嬲嘅其實係位於附近巴士總站嘅一塊用地，事關佢哋要到前日下午先獲通知可用有關用地。
李又話，申請墟市要經六、七個部門審批，喺民政同地政兩個部門就「棘住」咗，拉鋸咗成兩個星期，要到活動開始前一日先知係咪用到塊地，認真頭痕喎。