政情：怪政府拖累 林鄭約茶敍 區議員冷對
上月區議會選舉建制派大敗，潰不成軍，大部分現任區議員都角逐連任失敗，部分建制派更歸咎於政府止暴制亂無能、施政失敗，拖累建制派選情。特首林鄭月娥尋日邀請一眾喺區選中落選嘅建制派區議員到禮賓府茶敍，事後一眾區議員都話，得一小時嘅見面時間真係冇咩用，同Happy Hour（歡樂時光）冇咩分別，見完好似冇見過咁，甚至有人話今次最大得着係可以去禮賓府參觀，真係寧願食三文魚、飲可樂，都費事理林鄭喇。
會面無深談 當食自助餐
尋日林鄭月娥就喺禮賓府同一眾落選嘅建制派區議員茶敍，聞說政府邀請咗近三百人，但就只得約一百人出席，南區區議員陳家珮（Judy）、深水埗區議員陳穎欣（Joephy）同李梓敬（Dominic）都有畀面出席。不過Joephy同Dominic茶敍後就喺禮賓府門外拍咗段短片，Joephy就喺片中提到出席今次茶敍嘅人少，同林鄭見完面都冇咩感受可言，認為話就話會面「深談」，但絕對唔係「談心」，仲反問同林鄭講得嗰三分鐘，算咩深談喎，只係大家問候吓。
Dominic亦都笑言成件事比佢想像中更加「冇內容」，因為五分鐘客套開場白後都冇機會討論政策。而佢最開心就係有自助餐食，佢仲好似飲食節目咁，介紹有三文魚、可樂等，佢自己就飲咗兩罐可樂，都叫做維番車費咁話，真係搞笑。雖然係咁，但Dominic都有把握機會同林鄭反映市民希望盡快止暴制亂嘅心願，亦都有提及財政預算案嘅期望。佢又話，今次可一次過見晒咁多位司局長，但似乎都冇咩特別成效，仲講笑話可能知冇乜區議員會到，所以要一班司局長嚟撐場。
如歡送會一聚 坦言冇期望
而Judy就形容茶敍好似Farewell（歡送會）咁，覺得好無奈，坦言對茶敍冇特別大期望，見面亦冇咩實質目的，都係當大家區議會同事聚一聚。佢又話，林鄭雖然話區選係一場艱難嘅選舉，但就唔係好覺佢有為建制派大敗而向大家致歉，又認為呢啲交流會係嚟得太遲。
正如幾名區議員所言，林鄭依家先約見建制派區議員真係無謂，連班區議員都話見完好似冇見咁，政府擺明就係做騷，都唔怪得人哋都費事睬你喇。