中環出更：陳恒鑌議辦被「裝修」逼換鐵門
喺修訂《逃犯條例》風波下，暴力示威行為不斷，唔止商舖、食肆、中資銀行設施被人搗亂損毀，唔少建制派議員嘅地區議員辦事處亦都被反修例示威者大肆「裝修」破壞。民建聯立法會議員陳恒鑌（Ben）喺葵芳邨嘅議員辦事處之前亦都慘被「裝修」，最近就換上鐵門。Ben坦言，辦事處之前被嚴重破壞，損失慘重，所以就將議辦門口原本嘅捲閘換成鐵門，話要加強保安喇。
直言好彩冇放火
Ben嘅議辦喺一、兩個月前，即反修例示威激烈時被大肆破壞，當時議辦嘅玻璃門同玻璃窗都被打爛，冷氣機、電腦同影印機都無一幸免，直言「好彩冇放火燒」。而佢亦都有就議辦被破壞報警，可惜至今破壞者都未被繩之以法。
不過喺議辦大門口裝上鐵門，會唔會畀人重門深鎖嘅感覺，搞到啲街坊唔敢上門呢？Ben就話唔會，事關佢哋依然係用玻璃門，新安裝嘅鐵門只係喺夜晚議辦收工後先至會關上，街坊喺議辦外仍然可以望到議辦入面嘅情況喎。希望Ben嘅議辦唔會再被「裝修」啦。
卓妮