中環出更：漢奸黎10日4攪局 李永達李卓人又有份
持續半年嘅反修例衝突仍未平息，尋日一批黑衣人隨處破壞扑爛商舖玻璃嘅行徑疑死灰復燃，而另一邊廂被內地官媒批評為「叛國禍港四人幫」之首、外號「漢奸黎」嘅壹傳媒黎智英疑興風作浪攪局，十日內第四度上演密會飯局，其中尋日嘅密會就歷時兩小時。
是次有份到漢奸黎何文田寓所嘅民主派人士都熟口熟面，包括民主黨（白鴿黨）立法會議員林卓廷，因違法佔領行動案被判囚八個月、獲緩刑兩年嘅白鴿黨前主席李永達，早年曾將漢奸黎捐款「袋住先」九個月嘅工黨前立法會議員李卓人，以及社民連主席吳文遠。莫非眾人於二○一九年結束前，又再諗計號召同路人最後玩鋪勁？
尋晚六時四十五分左右，由漢奸黎司機駕駛嘅七人車返回漢奸黎何文田寓所，坐喺司機旁車頭位置係李永達，至於身穿藍色外套嘅林卓廷就喺後排中間位置，其左右兩邊分別係吳文遠同李卓人，四人抵達後就匆匆入場密會喇。
仲有林卓廷同吳文遠
眾人喺黎宅密會兩小時，直至晚上八時四十五分，林卓廷等四人先一齊坐七人車離開。四人嘅目的地都一樣，一同於旺角警署外落車。吳文遠落車後步行離開，林卓廷、李永達及李卓人就一齊去港鐵太子站。
話時話，二○一九年即將結束，港人受反修例風波折騰咗半年，已經係遍體鱗傷，漢奸黎尋晚又搵泛民主要政黨白鴿黨、工黨同社民連代表齊集密會，究竟有乜不可告人嘅秘密同盤算，相信時間可以證明一切。
卓妮