政情：陳浩濂返母校交流 師弟為就業前景擔憂
唔少人都好緬懷校園生活，財經事務及庫務局副局長陳浩濂（Joseph）尋日就返母校香港華仁書院（港華）同師弟見面交流，Joseph話班師弟都好擔心近期嘅社會事件表達咗唔同意見同關注，亦有反映會唔會影響到畢業後嘅就業發展機會。
向同學講解香港核心競爭力
修例風波持續，Joseph話班師弟喺會面中表達咗好多唔同意見，包括政府初時處理修例手法、警方執法時對待示威者使用嘅武力程度、社會紛爭對經濟嘅影響等。佢話因為同學都好積極規劃自己將來，所以都表達咗對社會紛爭會唔會因為咁樣而影響佢哋第時畢業時就業發展機會嘅憂慮。
Joseph話同啲同學有深入交流，政府亦都會跟進並已由依家嘅機制同埋特首提及過嘅行動方向展開有關工作，希望大家畀啲時間，等工作有初步結果嘅時候，再畀社會討論成效。佢亦有就香港嘅國際金融中心地位，向同學分享香港嘅核心競爭力，例如資金自由流動同監管制度同外國主要市場接軌等，都未有受到近月社會事件而影響。