政情：工廈政策亂 立會小組開公聽會

譚文豪自動當選委員會主席

小組委員會尋日喺會議上選舉主席，而譚文豪喺冇對手之下自動當選。小組委員會隨即討論未來嘅工作方向，多名議員直指過去工廈政策混亂，部門執法鬆緊不一，質疑部分政策已經過時，令到工廈用戶無所適從，希望透過公聽會，邀請持份者到立法會直接向政府相關部門反映意見，從而更有效運用工廈嘅空間。

其實，早於一七年十月初，立法會內務委員會已討論由譚文豪提出成立相關事宜小組委員會嘅建議，當時佢批評工廈政策限制咗藝術嘅發展，而多名建制派亦都表明贊成，但認為應該喺發展事務委員會轄下成立，最終亦通過成立有關小組委員會。