政情：加快檢控得把口 司底驊唔知醜
反修例風波持續半年，本港街頭不斷發生示威同暴力衝突，但政府至今仍然止暴制亂無方。一直醜聞纏身、民望長期「墊司底」兼有「避政司司長」之稱嘅律政司司長鄭若驊神隱多時，最近先頻頻上水。尋日仲喺網誌提到，自六月起有數千人因反修例被捕，話刑事檢控科有一隊專門負責處理涉及公眾活動案件。雖然話有人專責處理，但至今只得三十幾人完成司法程序，按情況咁睇似乎檢控程序都冇加快到，所謂有團隊專門負責真係笑話，難為佢仲講得出口。
話說尋日鄭若驊喺網誌上提到，被捕嘅幾千人大多涉及暴動、非法集結、藏有攻擊性武器、襲警及刑事毀壞等罪名，仲提到部分案件已展開刑事司法程序，律政司會就案件證據及適用法律進行客觀同專業分析，按《檢控守則》獨立決定係咪提出檢控。唔止咁，佢仲講埋案件進入司法程序後，同埋正式審訊嘅情況。
鄭若驊話案件進入司法程序後，法庭會先處理保釋或押後聆訊嘅申請，仲話會考慮埋控辯雙方嘅立場同埋論述再作決定。而當案件進入正式審訊時，法庭會審視相關法律、證據同埋聽取控辯雙方陳詞後再作決定，仲話或者有人對結果不滿，但都唔應該抨擊司法人員或破壞法院。其實佢講嚟講去，都係冇講到點樣加快檢控程序。
此外，佢亦有提到，若有充分可被法庭接納嘅證據，令案件有合理機會達致定罪，律政司先會提出起訴，仲話會繼續無私同獨立地工作，以最高專業標準處理案件。不過，根據之前警方所提供嘅數字，至十二月初已有六千人被捕，但當中不足一千人嘅案件正進行司法程序，唔通呢個就係所謂嘅最高專業標準？
羞恥事掛嘴邊 重提仆倒倫敦街
話時話，鄭若驊喺網誌一開頭仲好意思講番自己上月喺英國倫敦受傷嘅事，聲稱自己逐漸康復中，仲話喺病假期間一直都透過電郵同同事緊密聯繫。佢自從受傷後一直神隱，行蹤成謎，「消失」咗逾半個月後先返香港，而佢返港當日隻左手都仲未好番，當時亦有唔少人質疑點解佢仲着到樽領衫，其後仲喺訪問中自爆梳洗同更衣都要其他人幫。
呢邊廂講到自己有幾慘情，做乜都要人幫，但另邊廂又話可以透過電郵工作，到底佢隻痛手有幾痛，一切真相就只有佢自己先知喇！