中環出更：委員會選唔到主席 蔣麗芸鬧爆郭榮鏗
立法會司法及法律事務委員會尋日開會，繼續處理正副主席選舉事宜，原本各主席候選人介紹完政綱後，就進入提問候選人環節，但議員陳淑莊就話因為稍後要開會，加上時間不足，建議主持會議嘅法律界議員郭榮鏗將提問環節留待下次會議進行。議員蔣麗芸（Ann）發言時就話，郭主持咗咁多次選舉，多謝郭勞心勞力，但指會議有好多嘢要傾，不如爽手快啲投票選主席，又話啲大律師鍾意揼波鐘，搞到費用愈收愈貴，但主持會議揼極都唔會收得貴。
議員林卓廷聽到之後，就話Ann指控身為大律師郭榮鏗嘅法律專業，指郭揼波鐘係呃唔到多啲錢嘅，認為係對郭嘅專業具有侮辱性。Ann就話冇講過個「呃」字，林就質問Ann：「你話人揼波鐘即係收多咗錢，個意思係咪咁？」 林仲鬧阿Ann所屬的民建聯最無恥。郭就勸大家再係咁就開唔到會，最終因時間不足，郭宣布結束會議，話提問環節會喺下次會議進行。今次已係第四次會議，但仍然未能選出主席，真係唔知搞到幾時。
開咗10次會 內會主席仍未敲定
此外，內務委員會尋日召開第十次會議，仍未能選出正副主席，同樣是郭榮鏗做主持，包括保險界議員陳健波在內嘅多名建制議員不滿郭的主持會議手法，更直斥離譜濫權。郭就叫陳健波「你睇住啲血壓，因為收成期嘅時候爆（血管）就好唔抵」。
卓妮