中環出更:區會大翻盤 狄志遠勸建制泛民求變

喺新一屆區議會開波後,建制派就變成少數派。面對區議會形勢大改變,立法會前議員、新思維主席狄志遠尋日出席一個名為「香港再出發」嘅研討會時就話兩派人都要重新學習。

泛民學執政 建制要制衡

狄志遠曾經係民主黨黨員,佢以大埔區議會為例,全部議席都畀反對派拎晒,而反對派一直扮演反對政府嘅角色,但依家一下子變成區議會嘅大多數,咁係咪就淨係反對,乜都唔使做?佢覺得反對派要重新學習執政同埋管理資源。至於建制派,都唔係輸咗咁多就乜都唔使做o架,建制派可以考慮點樣抗衡反對派,監察番議會工作,地區政治咁樣先可以更加成熟。

新民黨中央委員甘文鋒亦喺區選落敗,佢話建制派需要反思落敗原因,唔應該淨係做地區事務,同埋唔係凡係政府推出嘅議案都要支持。佢話因為自己係建制派,過去比較少指出地區議會做唔到乜嘢?有邊啲位失職?依家係時候監察番議會喇!

佢又話依家政界最需要係得到中央信任,又能夠監察政府嘅革新派,如果建制派轉唔到型,都好難行落去。

兒童事務委員會委員、民主思路前聯席召集人黃梓謙就鼓勵甘文鋒,叫佢唔好放棄,又用自己嚟做例子,喺一六年都輸過立法會選舉,呢幾年咪又發展得幾好。

甘文鋒多謝番黃梓謙嘅鼓勵,又話依家可以專心湊女都幾好啊!

卓妮

第一手消息請下載on.cc東網iPhone/iPad/Android/Windows Phone Apps