中環出更：發展有機生態 梁福元批政府齋噏唔幫拖
大棠有機生態園近日舉行二十五周年銀禧晚宴，同時都係員工服務獎嘅頒獎典禮，其中十八鄉鄉事委員會前主席、元朗區議員梁福元慨嘆搞呢個生態園已二十幾年，覺得非常感動同開心，仲話環保生態教育絕對有得諗，係未來趨勢咁話，但就批評政府講就講得多，但得個講字任何幫助都冇喎。
申請辦民宿 至今影都冇
梁福元直言自己係搞有機生態嘅成功例子，由起初幾名員工到依家幾百名，但靠嘅都係自己努力，政府完全冇政策配套支援，又冇資助過，仲話香港小規模家庭式或中小型嘅，想做都冇得做，首先土地成本高，有都唔願意拎出來，或搵到食但土地唔係自己嘅，好快唔想繼續做落去，導致有心人都做唔到耕種。佢又提到民宿問題，話現時台灣、日本甚至全世界都發展民宿，但佢向政府申請咗幾年，到依家都未搞得掂，新界鄉議局去台灣考察返嚟提供政策意見，政府又無反應，惟有自力更生。
地少人工貴 耕種甚艱難
元朗區議會主席沈豪傑坦言喺香港搞耕種難，難係冇太多人想從事農業，人工都係問題，地方相比大陸同外國都細，先天性不足令靠農業維生生計好難，只可以細細塊地種嚟自己玩、自己食咁。另外，荃灣區議員林琳亦話種有機農作物需要大片嘅有機田地，如果只係用一小塊地嚟做，好有可能污染隔籬土地咁話，佢又話以前喺澳洲曾經種過辣椒仔，依家住House都算有空間，計劃種植啲有機農作物。
同場仲見到香港旅遊業議會主席黃進達（Jason）同立法會旅遊界議員姚思榮。Jason話香港搞農作係有市場，因為唔少家庭都着重教小朋友綠色生態同環保意識，但奈何香港農莊唔多，年輕人想加入亦唔容易，全因市場唔大，成本難控制。佢仲提及唔少外國地方，例如東南亞，地方大到可將農業作為旅遊景點項目嚟營運，如果香港都想倣效嘅話，政府真係要畀多啲支持嘞！
卓妮