「年紀大，機器壞」，長者多病痛都好正常，有立法會議員就提到屬於關愛基金援助項目嘅長者牙科服務資助都有成五十八萬人符合資格，但直到今年九月底僅得六萬六千幾人參與，所以問勞工及福利局局長羅致光，係咪政府宣傳不足或申請手續繁複。羅致光就話，有關項目只為長者鑲活動假牙，但鑲假牙嘅人唔多，所以出現使用率低嘅情況。其實早前已有長者批評輪候鑲牙時間過長，羅就歸咎牙醫不足，好可能因為長者等得太耐而卻步，睇嚟羅致光要認真解決呢個問題至得喇！
