政情:岑子杰區選勝出 被質疑當踏腳石

今屆區議會選舉民主派取得八成半議席,喺今次區議會中亦有參選嘅民間人權陣線召集人岑子杰亦都當選,成為新一屆區議會沙田區區議員。岑尋日出席一個電台節目時就話,佢對民主派贏取咁多議席都好意外,尤其佢嘅對手做咗區議員二十八年,又自爆有居民質疑佢只係當議席係踏腳石,唔會認真做嘢,所以佢都花咗唔少時間同選民解釋咁話。到底佢係咪口輕輕,真係會用心服務市民真係要拭目以待喇。

岑子杰尋日又話,當選第一樣要改革嘅就係作為區議員嘅態度同行事方式,佢話啲建制派以前成日利用議會嘅便利去打壓異己,所以佢覺得民主派議員更加應該尊重制度民主,防止班建制派可能嘅利益輸送。而同樣喺今次區議會中當選嘅前學聯成員、荃灣區候任區議員岑敖暉(Lester)就覺得,區議會首要任務係審視現有制度是否符合公眾對民主嘅期望,其次就係改善區議員喺地區同本港政策上嘅影響力喎。

第一手消息請下載on.cc東網iPhone/iPad/Android/Windows Phone Apps