政情：劉健儀接案件過日辰 阿仔似退休成日旅行
前立法會議員劉健儀（Miriam）告別議會生涯多年，喺政圈淡出嘅佢就退而不休，重返法律界任職律師，年過七十嘅佢仲笑言依家要靠接案件「過日辰」，反而佢自己兒子三十出頭，生活比佢更加似退休咁話。
兒子一年只需考兩份卷
Miriam話，佢兒子讀咗兩個學位，分別係電影同經濟學，不過就被爸爸覺得讀嘅嘢唔夠專門，希望兒子可以考番個專業資格，喺順水推舟之下，兒子依家就考緊會計師資格喇。Miriam話，覺得兒子嘅生活過得好悠閒，事關考會計師資格有好多份唔同嘅專業試，但兒子一年只會考兩份試卷，而每個考試都用三個月去準備，之後又會去番兩個月旅行。果然聽落都令人羨慕。
講起去旅行，Miriam今個月就會同屋企人去日本東京同大阪玩，不過佢最期待嘅其實係去魚市場食刺身。佢又提到兒子好乖，去旅行時會拖住佢一齊行街，因為佢係長者喎。被問到兒子拖媽媽外，仲有冇拖其他女仔，Miriam就話唔清楚，但就有教兒子唔好行差踏錯喎。