政情：怕高學歷屈就 張可森唔一定請「手足」
區議會選舉啱啱結束，好多首次當選嘅候任區議員都需要聘請議員助理，部分區議員已經在社交網站發貼文招聘，當中有民主派議員就話會聘請抗爭運動中嘅「手足」。不過喺今次區選中勝出嘅屯門新墟候任區議員張可森就話佢唔一定請「手足」喎，究竟點解呢？
標明「因社會運動被捕者不拘」
原來張並非唔想請「手足」，只係擔心唔一定請到，因為有啲「手足」其實學歷高，資質又好，一萬多元嘅月薪反而覺得委屈咗佢哋，所以佢招聘時都唔會只限「手足」申請，不過都會標明「因社會運動被捕者不拘」。
不過唔少議員就對「手足」申請職位表示歡迎，其中元朗候任區議員張秀賢喺社交網站貼文聘請議助時，就列明「因社會運動而被捕、被起訴或定罪背景不拘」。一眾南區嘅候任區議員亦都列明歡迎「手足」，認為曾被拘捕或入獄嘅人都可一起共事。連立法會議員楊岳橋亦都喺社交平台發文話要「聘請手足」，仲話「手足」如有興趣就可申請，仲可以自己揀去邊區工作喎。