政情：捱完催淚煙 段崇智終復工
香港中文大學早前有示威者同警方激戰，校長段崇智期間曾親身去到中大二號橋游說示威者，臨離開時警方就施放催淚彈，段當時身處濃煙當中，之後冇耐就入咗醫院。中大學生會喺社交網站發貼文，指段已經出院，學生會仲將設置「致段校長的祝福」收集箱，話要收集中大師生同校友嘅心意卡，再轉交段咁話。而段尋日亦向師生發信，親證自己已出院同復工。
段喺公開信話，中大過去幾星期經歷極為嚴峻嘅挑戰，校園發生一連串衝擊事件，對中大人而言，係非常艱難嘅一段日子。佢喺上月十六日抱病入院，幸而並無大礙，身體已大致康復，現已繼續投入工作，希望校園盡快得以修復，等大學成員嘅安全同健康得到保障。
校園多處抽樣本化驗
中大曾經被催淚煙籠罩，為審慎起見，段就話，大學已委託獨立認可實驗室喺校園不同地點抽取空氣、水質及環境表面樣本，各項樣本經專業人員收集後，已立即送往化驗，化驗結果將陸續收到，校方會喺收到結果後，第一時間向大家公布咁話。