政情：毛孟靜疑歧視孕婦 唔畀容海恩做副主席
立法會保安事務委員會尋日下午開會，繼續選舉正、副主席，不過委員會開咗三次會，最終都只係選出立法會議員陳克勤出任委員會主席，副主席一職仍未選出，仲爆出涉嫌歧視孕婦風波。話說喺委員會進行副主席選舉期間，懷有第二胎嘅立法會議員容海恩（Eunice）就被提名選副主席，點知早前一句「食慣洋腸」都覺得係侮辱嘅立法會議員毛孟靜（毛婆），就質疑Eunice下個月就要生BB，放產假至少放「前四後六」，係完全唔能夠接受，仲話應該撤回Eunice選副主席嘅提名，真係有口話人冇口話自己，認真過分。
雙重標準 「食慣洋腸」都當侮辱
早前立法會議員何君堯一句「食慣洋腸」，毛婆都覺得涉歧視，一眾民主派議員更對何群起而攻之。點知身為人母嘅毛婆，尋日自己就質疑Eunice呢位媽媽。對於毛婆嘅質疑，Eunice就話，議員係冇產假放，而佢自己亦冇講過要放「前四後六」，由於佢要開刀產子，所以會用一個月時間休養，認為如果係尊重女性，都要畀番時間佢休息，相信主席屆時都會作出相應安排同協調，唔會阻礙到會議流程。點知毛婆仲死撐︰「叫佢休息點會係侮辱？ 」仲鬧Eunice低智商。Eunice直斥毛婆嘅言論係冒犯緊孕婦嘅基本權利。毛婆都係一個母親，但就質疑懷孕中嘅Eunice，係咪歧視大家都心中有數。
陳克勤當選保安事務委員會主席
此外，委員會主席經多次會議後，就由陳克勤擊敗多名民主派對手當選，不過陳都經過民主派一輪「圍攻」，其中議員鄭松泰就話，曾經要求到新屋嶺扣留中心考察，但被政府拒絕，要求陳當選主席，要安排議員到新屋嶺考察咁話。之後又輪到議員林卓廷，佢話依家社會上出現矛盾，警隊執法備受質疑，質問陳當選主席後會否加開會議，或者喺未來會議傳召保安局同警務處高層，盡快就所有重大質疑逐一解畫。
陳克勤回應時就話，自己做主席係會將個人政治立場擺埋一邊，會畀唔同政治立場嘅議員表達睇法，喺參考議員意見後先至決定係咪去新屋嶺參觀。佢又承諾會邀請警務處高層到委員會匯報罪案數字，議員到時都可以喺會上討論警務問題喎。