中環出更：屢遭破壞 何君堯荃灣議辦清空
立法會議員何君堯喺過去嘅區議會選舉中角逐連任敗選，失去其屯門樂翠選區嘅議席，即將唔再係「雙料議員」，而佢位於荃灣、曾被示威者大肆破壞嘅議員辦事處近日亦都人去樓空，清空晒乜都冇。雖然唔知何會唔會觸景傷情，但有網民就話何以後都唔使再擔心辦事處畀人打爛，甚至有網民話開心都嚟唔切添。
傢俬海報招牌唔見晒
何君堯位於荃灣荃豐中心嘅議員辦事處喺七月曾被示威者破壞，玻璃窗都被扑爛晒，辦事處入面何嘅肖像更被人掟雞蛋，辦事處之後用木板圍封。不過封完後兩個月，該辦事處再被人破壞。最近該辦事處已清空晒，入面原本有嘅傢俬、海報、招牌全部唔見晒，仲有圍欄同封鎖線圍住辦事處，又貼咗張「暫停服務通告」。而有關通告係十月二十日發出，話辦事處畀人破壞，未能運作，會以流動方式辦事。
對於何君堯辦事處清空一事，有網民就話開心都嚟唔切，又有人話何以後都唔使擔心辦事處畀人打爛，因為已經冇需要運作，而有人就提及何嘅辦事處連累商場，話有關商場真係多得佢唔少喇。
卓妮