中環出更：黃楚淇對港孩有期望 一定要識做家務
依家嘅小朋友通常都被照顧周到，坊間就有批評「港孩」唔止唔識做家務，就連自己綁鞋帶都未必識。仁濟醫院董事局副主席黃楚淇（Macy）就話，小朋友一定要做家務，而佢自己細個嗰時都有做，認為小朋友終會長大， 希望佢哋成家立室時都識得照顧另一半咁話。而同場嘅沙田區議員李世榮就話自己都會培養小朋友做家務，而佢自己最叻就係掃地喎。
Macy話，佢細個時如果唔做家務就會畀人鬧，而佢都認同要從小培養小朋友做家務，因為小朋友總有一日長大，會結婚成家立室，所以都希望佢哋喺第二個家庭可以照顧另一半。仁濟醫院當年顧問蔡高燕姬都同意Macy講法，仲話佢個孫女得七歲，但都已經識自動自覺洗碗，仲洗得好叻添。
李世榮：兩小朋友好享受做家務
同場嘅仲有李世榮同埋沙田體育會會長韋國洪。李都覺得依家啲小朋友太幸福，好多屋企都有聘請工人做家務，而佢自己本身都有請工人，但都會訓練兩個小朋友做家務，至少食完飯後要洗番自己啲餐具同埋打掃自己間房。而兩個小朋友唔止唔抗拒做家務，仲好享受咁話。李又話，咁多樣家務中，佢最叻就係掃地，就算得三百平方呎嘅地方都會掃成半個鐘，自言好似有強迫症咁，一粒塵都唔可以放過，所以喺親戚當中佢出名掃得乾淨，個個掃地都會搵佢，真係搞笑。
韋國洪：令細路學識服從負責任
不過韋國洪細個就冇點做家務，佢解釋自己係鄉村人，大男人觀念好重，家務都係媽媽做，佢就會去劈吓柴。雖然細個唔使做家務，但佢個仔就一定要做，佢仲會指示老婆叫兒子將垃圾掉去村口垃圾站，因為要令小朋友學識服從同負責任，否則遲吓煮餸唔夠油，嗌個仔出去買油都嗌唔郁，咁就唔掂喇。
卓妮