政情:民主派怕內訌?傳油尖旺區會主席輪流做

喺今屆區議會選舉中,民主派取得逾三百個議席,喺十七區更加佔過半數議席,日前已傳出唔少民主派爭做區議會主席,而有指油尖旺區議會嘅民主派已有共識,計劃將會由兩名區議員輪任主席一職,每人任期兩年。

或由林健文余德寶輪任

早前有指曾擔任葵青區議會主席嘅民主黨單仲偕建議,將主席任期由四年一屆改為兩年一屆,隨後亦有其他嘅區議員都表態支持,例如大埔區。據了解,油尖旺區或會推行輪任區議會主席,有傳將由區內較資深嘅獨立民主派林健文同公民黨余德寶輪任。

有指林健文係因為本身律師工作,所以唔會做足四年,而余德寶就曾經喺Facebook上講過,有街坊鼓勵佢擔任主席一職。

至於其他區方面,東區區議員趙家賢亦係主席人選之一,但尋日被問到任主席傾向,佢就話所屬嘅民主黨唔會為搶位而搶位,希望可以盡力促進新任議員順利展開區議會嘅工作,仲話同新任議員集思廣益後先會決定人選。

第一手消息請下載on.cc東網iPhone/iPad/Android/Windows Phone Apps