政情：李卓人帶隊搞事 推澳洲版香港人權法案
美國總統特朗普已簽署《香港人權與民主法案》，有關法案生效後旋即引起中方不滿，本港各界炮轟。不過反對派依然未收手，工黨前立法會議員李卓人更帶隊搞事，計劃推動澳洲版香港人權民主法案，真係離譜。
譚文豪黎恩灝同行
李卓人曾赴美唱衰香港，有份會見美國國務卿蓬佩奧及美國眾議院議長佩洛西。唔知係咪食過翻尋味，佢又再帶頭去搞搞震，明日將帶團到澳洲，期間會同跨黨派國會議員同智庫會面，包括曾到本港視察示威嘅國會議員，希望由民間包圍政府，促進當地推出澳洲版香港人權民主法案，設立機制去制裁打壓本港嘅官員。而此行仲有立法會議員譚文豪、民間人權陣線副召集人黎恩灝。
李接受訪問時仲話，澳洲有份為《中英聯合聲明》背書，故此道義上有責任監察本港人權同民主自由狀況，加上澳洲同本港一樣面對中國滲透，有需要借鑑本港情況喎。李所言係咪佢一廂情願嘅諗法就未知，但佢今次去澳洲明顯有晒通盤大計，又想勾結外國勢力干預本港，真係唯恐天下不亂喇。