政情：陳羿辭官一身輕瞓到自然醒
政策創新與統籌辦事處成立大約一年半，但副總監陳羿（Donald）就喺幾個月前遞信唔撈，去到近日終於正式離職，離開官場嘅佢成個人都輕鬆晒，打扮都唔再西裝骨骨添。
享受生活 未諗新工
Donald話，唔使返工後一嘗瞓到自然醒嘅滋味，一唔使返工就咁放肆？佢笑住話，都係八點幾就醒咗，似乎慣咗早起返工改唔到呢個習慣喇，而佢第一日離開官場嘅行程都相當慢活，好似歎咖啡、行書局，唔知係咪刻意放慢腳步，享受吓生活。
其實之前坊間對佢未來動向有唔少揣測，但佢話要休息幾個月仲未有新安排，而隔咗幾個月後，佢嘅講法仍然一樣，仲為假期作計劃，好似諗定要睇咩書，但佢話無論計劃幾周詳，相信最終都唔會睇得晒啲書喎。