政情：老友記展創意 王賢訊即場學師
嗇色園近日舉行社區學院作品展，展示唔少老友記嘅作品，好似玻璃彩繪、黏土製作及手指畫等，其中仁濟醫院主席王賢訊（Vincent）都喺現場，講起原來佢同嗇色園有好多重關係，自爆不但現任嗇色園主席係佢「舅父」，而佢姐夫嘅姨媽竟然係前嗇色園主席嘅妻子，就連佢太太人生第一次求籤都係喺黃大仙求（口架）。
其實Vincent同嗇色園主席唔係真係親戚關係，只係對方係佢契妹嘅舅父，大家關係又好好，就直呼對方為舅父喇，有親切感啲。至於太太求籤求啲咩？佢就講笑話唔係求嫁畀佢喎，因為嗰陣已經結咗婚喇，原來嗰陣太太出咗本小說，求希望本書大賣！
大讚長者作品 籲青年應倣效
作品展覽內容琳琅滿目，Vincent話最欣賞廢物利用製造嘅物品，仲大讚長者好有創意，話老人家付出好多心機，年輕人都要學習吓咁話，佢話會同仔女喺屋企搵啲廢物出嚟，齊齊做手工！佢仲即場露兩手寫書法，但就謙虛話平時完全冇練過，都係即場跟師傅學習，寫得唔靚唔好見怪喎。