政情：區會主席位 白鴿黨多區內訌 自己友爭櫈仔

羅健熙徐遠華同有意爭南區

嚟緊呢屆區議會由民主派當道，正、副主席已勢由民主派包攬，作為大戶嘅白鴿黨更出現黨友之間競逐嘅情況。身為白鴿黨副主席嘅南區區議員羅健熙坦言，佢與該黨同於南區順利連任嘅徐遠華都屬當區較有經驗議員，兩人都有意出任主席，而另一角逐嘅仲有當區區議員司馬文。徐回覆查詢時話，由於當區未聽到有新丁想出任主席，而作為有經驗嘅議員係有責任帶新人，即使唔做主席，亦可能要擔任區議會其他小組委員會主席。佢就認為自己做咗三屆區議員，又做過小組委員會主席，勝在夠資深，又稱羅身兼白鴿黨副主席職務，比較忙碌，係咪兼顧到區議會主席一職都係考慮因素，但佢都讚羅同民間團體多聯繫，都有優勝之處。

羅健熙就話，區議會主席一事仍未有定案，有經驗嘅區議員做主席都係好合理，認為大家各有優勝之處，但強調自己雖然係白鴿黨副主席，但如果出任區議會主席亦都兼顧到，並冇太大問題。

屯門中西區亦盛傳競爭激烈

唔止南區，中西區主席之位亦盛傳競爭激烈。自一九九四年起任中西區議員嘅鄭麗琼可謂白鴿黨內最資深議員之一。鄭就話仍然考慮緊是否競逐主席，但認為自己知悉會議常規、工作勤力，有足夠經驗，可勝任成為該區領導人。而該黨中西區議員甘乃威亦係資深區議員，近日佢仲撰文建議政府應將市政同城市規劃歸還民選議會，又希望新當選議員集思廣益，一齊改革區議會，似係滿腔大志。到底兩人會否拗手瓜，真係要睇過先知。不過有指該黨當區區議員吳兆康亦有意角逐主席，但吳至截稿仍未回覆。

此外，雖然屯門區議會主席一職有指係由白鴿黨屯門區議員朱順雅出任，但朱就話要慎重考慮係咪出選。而該黨「老鴿」陳樹英今屆重返屯門區議會，之前已表明對做主席持開放態度。最終主席人選花落誰家似乎都仲要睇吓。至於該黨沙田區議員程張迎亦係熱門主席人選，但有沙田區議員就話當區區議員衞慶祥亦都落力拉緊票，唔知最後邊個跑出喇。