中環出更：謝偉俊柯創盛無興趣選超區
今屆區議會選舉塵埃落定，雖然建制只能夠保住一成半議席，亦失去十七個區議會主導權，但依然有少數「雙料議員」能夠順利連任，來自九龍東的立法會議員謝偉俊（Paul）同柯創盛（柯仔）都幸保不失，取得參選下屆立法會選舉中俗稱「超級區議會」嘅區議會（第二）功能界別入場券。不過，兩人似乎對參選超區興趣不大，各有盤算。
阿Paul想多陪另一半
成功連任灣仔區議會樂活選區區議員嘅阿Paul，本來代表建制派出戰超區呼聲甚高，可惜佢萌生退意，話自己年紀大，想多啲陪吓另一半，仲話會認真考慮係咪競逐連任下屆立法會九龍東議席，所以現階段講係咪參選超區確係時間尚早。
其實阿Paul完成新一屆區議會任期已到二○二三年，屆時佢將年滿六十四歲，確係到達退休年齡，但係政治嘅嘢一日都嫌長，好多嘢話唔埋嘅。
柯仔自言要先反省
至於以一百八十七票之差險勝人民力量譚得志（快必）、由二○○○年已開始擔任觀塘廣德選區區議員嘅柯仔，同樣話依家講參選立法會係尚早，暫時都係要收拾心情，總結地區經驗，向市民負責，但佢明言對超區無乜興趣。事實上出戰超區好大風險，無把握只會送死，究竟兩人最終會否改變主意，相信過多幾個月會逐漸浮面。
卓妮