中環出更：搞生意路途崎嶇 趙鍾月琼幸苦盡甘來
香港中華廠商聯合會婦女委員會日前舉行廿五周年晚宴，名譽主席趙鍾月琼（Luna）同冼婁文英都有出席。Luna就分享自己過去做生意嘅點滴，原來佢十幾歲就結婚，隨後就同丈夫五湖四海去做生意，諗起初初喺內地做生意時嘅辛苦日子，Luna都話幸好依家都苦盡甘來。
Luna形容嗰個年代內地好落後，連酒店都未有，去洗手間都係用緊草紙，慨嘆真係好辛苦。而佢年輕時都撞過唔少板，例如帶貨入內地被海關扣留等，不過佢就笑稱因為自己唔識嘢，所以都唔知驚，仲直接同有關方面理論咁話。咁以前一個女人去傾生意，會唔會多少受到男性欺壓？佢就話完全冇，通常男士都唔會欺負女人，加上自己「夠膽死」嘅性格，同人傾嘢完全唔會輸蝕，仲試過傾唔啱就拍枱走添。
現任主席李阮錦鑾同首任暨榮譽主席陳小玲都在場，李太話自己細個好鍾意玩煮飯仔，但到依家都未識煮飯，全因媽咪一力承擔。佢又話，自己有四姐妹，全部都唔准入廚房，結婚後又有丈夫及工人姐姐幫手，覺得自己好幸運喎。至於做生意，李太就話，佢第一個老闆係日本人，由於長期唔喺香港，完全係無王管，之後轉做裝飾品貿易，接觸嘅大多係女設計師，所以都冇畀男士欺壓。香港耀能協會主席彭徐美雲都有類似經驗，係美國畢業後就入咗美國公司工作，老闆對佢好好，而第二個老闆就係丈夫，咁一定唔會被人恰喇。
郭振華讚職業女性有效率
香港工業總會名譽會長郭振華就大讚職業女性，話同女士傾生意好有效率，想點做或想達到咩目標都開門見山坦誠講，條件清楚、計晒數、仔細得嚟又決斷，完全唔輸畀男性咁話。不過同女士傾生意最重要保持距離，言語上都要嚴謹少少，避免產生不必要誤會喎。
卓妮