政情：取消慈善跑 王庭聰好心痛

籌款委員會主席王庭聰話慈善跑經過幾個月來嘅籌備，一切已經準備就緒，然而警民對抗日趨激烈，按協辦機構嘅風險評估，活動不宜舉行。佢話叫停慈善跑，實在好心痛，但目前佢最關注係亂局盡快平息，香港得以恢復正常秩序。

向參賽者退錢

籌款委員會成員陳正欣就指慈善跑無法如期舉行，小母牛願意向個人以及團體參賽者，退回已籌款項同報名費，而團體隊伍更可選擇保留名額至下一次嘅慈善跑。雖然活動告吹，難免影響到善款嘅募集，但主辦機構仍要負擔場地費同製作費等開支。佢話小母牛嘅董事會盡力處理活動嘅開支同成本，至於活動嘅贊助商，就要個別跟進咁話。