政情：大住肚幫手主持會議 容海恩自備私家櫈
立法會《禁止蒙面規例》小組委員會尋日舉行長達九小時嘅會議，會議分五節進行。雖然作為小組委員會主席嘅進出口界立法會議員黃定光（象哥）都有主持大局，但身為副主席嘅議員容海恩（Eunice）都要分擔一下，幫手主持其中兩節會議。不過今年一月先誕下女兒嘅Eunice最近又再度有喜，大肚婆主持會議都咪話唔吃力。但Eunice就似乎冇有怕，仲自備私家櫈添。
有象哥𥄫住 好放心
佗住第二胎嘅Eunice雖然以前都做過委員會副主席，可以話駕輕就熟，不過佗住個BB、兩個一齊坐，佢都話係第一次。問到怕唔怕禁蒙面法咁具爭議，會上或會出現衝突，而且大肚婆坐得耐可能都會辛苦，Eunice就話，佢都只係頂兩節啫，而且個會好和平，象哥又坐定定喺會議室入面𥄫住，所以都好放心。不過佢就特登喺議員辦公室推咗自己張私家櫈入會議室，每到佢頂更，秘書處職員就會幫手推走原本象哥坐嗰張櫈，換番Eunice張私家櫈。Eunice話，因為會議室啲櫈椅背太直，佢嗰張可以向後挨，會坐得舒服啲喎。