中環出更：選主席遇拉布 梁志祥避席應對
立法會早喺上個月就已經復會，但一復會就又再開始拉布，就連立法會多個事務委員會選舉正、副主席嘅進度，都因為民主派以不停提名候選人等方式拉布而相當緩慢。部分事務委員會嘅議程仍然停留喺選正、副主席階段，更莫講話開始討論政府政策喇。雖然民主派不停提名候選人，令到建制派都冇晒符，不過屬建制派陣營嘅立法會議員梁志祥（祥哥）就有自己嘅方法去盡量減少會議時間被浪費，究竟係咩嘢一回事呢？
話說民主派議員過去幾個星期喺事務委員會不停提名其他議員競逐委員會主席，目的就係拖延會議時間，阻礙議會正常運作。早前就有一個委員會要開會選出主席，但祥哥喺會議期間就急急腳走出會議室，佢解釋係為免被民主派提名，浪費會議時間咁話。
避免泛民提名嘥時間
祥哥又話，自己並非任何一個事務委員會嘅正、副主席，所以仍然符合提名條件，而佢喺今個立法年度都曾經被民主派議員提名，與其要嘥唇舌同口水去回應話唔接受提名，不如見唔對路就即刻離場，以免提供機會畀民主派拉布喎。雖然祥哥嘅做法聽落去好似係斬腳趾避沙蟲，但至少又真係做到慳得一秒得一秒嘅。
卓妮