中環出更：鄧燕梨 潮流興惜食 買餸專揀次貨

仍然新鮮 只係外形欠佳

話說日前食德好舉行活動以嘉許一班支持食物回收工作嘅同行者，希望藉此推廣減少剩食。鄧燕梨就話，自己盡量都係喺屋企煮，唔止因為健康啲，仲可以控制分量同食材，直接避免浪費。佢仲話，自己鍾意去街市買餸，仲會特登選擇啲次貨，例如冇咁靚、熟過頭或爛爛哋嘅蔬菜水果，因為呢啲通常都冇人買，最終就會變成浪費，所以佢就自己買番去煮，用實際行動支持環保，減少浪費。佢又話，雖然係次貨，但其實都係新鮮，只係冇咁「靚仔」啫。

同場仲有慈善機構樂餉社事務總監宣嘉蕙（Connie）同行政總裁蓋布麗。講到點樣實行環保及惜食，Connie就話自己唔止係食素，平時如果啲食物剛剛過咗保質期，都唔會即刻掉咗佢，會從味道、外觀等方面判斷同衡量吓啲食物係咪真係唔食得，費事嘥咗咁話。而佢哋機構主要做乾貨回收，例如麵包類等。佢就提到，最近唔知係咪市場銷售冇咁好，所以多咗機構捐贈食物，而佢哋都有同航空公司合作，將膳食回收後，再分派畀各慈善機構，幫助有需要嘅人。

何欣倫話要身體力行，教育下一代注重環保。

宣嘉蕙（右）及蓋布麗（左）一齊出席活動。

已為人父嘅食油公司品牌經理何欣倫（Alan）就話，平時同兩個女兒出街都會叫佢哋自己帶食具、水壺，由基本做起，仲提到最近三父女去買環保飲管，點知女兒幫佢揀咗支紅色嘅，搞到佢唔敢帶出街用。而平時食嘢，如果女兒食唔晒，佢就要一手包辦，做「焚化爐」食晒啲食物喇，自言雖然係肥啲，但為咗環保都冇計，惟有勤力啲做運動咁話。

卓妮