政情：公民講場：經濟陷技術性衰退 財爺技窮無力挽回

反修例嘅激烈衝突持續，打殘香港嘅經濟。財政司司長陳茂波（波叔）尋日又做鍵盤戰士，話稍後公布第三季嘅經濟增長預計數字仍會係負增長，意味經濟已步入技術性衰退，又承認政府推出嘅支援措施，只能夠稍為減輕相關業界同市民嘅壓力，真正治本係拒絕攬炒。其實好多問責高官都公開呼籲，希望盡快令社會回復平靜，但係就愈叫愈爆，證明口噏噏根本冇用，而波叔講到咁被動，睇嚟佢已經冇招挽救低迷嘅經濟。