政情：鄺俊宇甩轆補飛 逾期申入禁蒙面法小組
政府先前用先訂立後審議嘅方式訂立咗禁蒙面法，立法會成立咗《禁止蒙面規例》小組委員會審議，委員會喺上個禮拜已經開咗第一次會，民主黨（白鴿黨）議員鄺俊宇都有出席，但原來佢當時並唔係委員喎。同日，佢因為「甩轆」唔記得申請加入委員會，即刻「補鑊」向小組委員會主席黃定光（象哥）提交逾期申請加入。但唔知本身佔大多數嘅建制派，會唔會「攔路」唔畀佢入呢？
鄺俊宇嘅逾期申請，按程序要擺上會傾。究竟因乜嘢事一開始唔申請，反而拖到依家呢？佢畀象哥封信就解釋係重整公務工作優次關係，我哋再問番佢，原來一開始有同事幫所有民主派議員申請加入委員會，但就偏偏唔記得填佢個名，搞到依家「呢咁Hea」。佢仲話自己唔記得睇番申請名單，所以都要負責任，依家就惟有「補鑊」申請啦！雖然遲咗申請，但佢就話自己人緣都應該唔差，加埋上次開會都在場，大家應該都感受到佢嘅誠意嘅。
小組委員會一共有五十八名委員，當中三十三個係建制派議員，非建制派就有二十五人。當問到係唔係因為趕住「冧友」而參加小組委員會，鄺俊宇就否認，仲話人哋咁多人，數字上咁懸殊，入埋都唔夠啦！
黃定光：要視乎全體委員點睇
小組委員會今日會召開會議，會點處理呢？身兼主席嘅象哥話，都需要睇吓鄺俊宇係因為乜嘢理由而遲咗申請加入，至於批唔批要睇全體委員嘅意願，並唔係自己獨裁獨斷、話晒事(口架)。佢仲話，如果就個人嘅睇法，佢就覺得無論議員係乜嘢派別，只要有意願參加委員會，同事都冇乜理由去阻止，因為議員嘅職責都係開會傾嘢，呢個同時亦都係議員嘅權利嚟。
早有先例 唔係次次入得番
實際上，逾期申請加入委員會嘅情況一直都有出現，先前《國歌條例草案》委員會都出現過「冧友」嘅情況，當時白鴿黨突然「轉軚」，包括鄺俊宇在內等三個議員提出逾期加入委員會，原來鄺俊宇早有前科，但最後都畀佢哋補入。但呢招亦唔係次次都得，之前工務小組委員會亦曾處理十名議員嘅逾期加入申請，最後淨係得一個人成功補入，所以鄺俊宇今次入唔入到，都仍然係一個未知之數喎。