中環出更：英議員致函何君堯母校 要求褫奪博士銜

何發表「洋腸」「曱甴」論引爭議

身處美國進修嘅香港眾志常委羅冠聰喺社交網站上載奧爾敦勳爵嘅信件，信中指何君堯嘅「曱甴論」猶如盧旺達大屠殺一樣，公然呼籲大眾殺死示威者，做法令人作嘔，又指何鼓吹黑社會採取無法無天同令人無法容忍嘅暴力行為，且誣衊一位立法會女議員因與英籍丈夫結婚而「食慣洋腸」，又貶斥中大學生係三百隻曱甴，「洋腸論」就帶有歧視女性同種族嘅含意，同「曱甴論」一樣咁可恥。

奧爾敦勳爵最後喺封信結尾話，佢曾經猶豫應唔應該去介入何君堯母校嘅事務，但了解到上個星期四香港立法會嘅討論（當日何君堯發表「曱甴論」），帶出點解佢哋喺英國有責任去支持香港嘅人民，又話自己係因為無其他辦法，所以先決定去信學校，要求學校委員會重新檢視會唔會撤回何嘅榮譽法學博士銜。

何君堯喺月中嘅立法會內務委員會會議中發表「洋腸論」，因拒絕收回言論被逐離場。而上周四喺立法會仲爆粗鬧八月底出席迎新日嗰三百個中大學生係曱甴，遭另一議員鄭松泰批評言論係下三流。

卓妮