中環出更：囡囡愛行山 湯修齊：由胎教開始
開講有話：「多多益善，少少無拘。」若果做善事又可以同時間做埋運動就最好不過，好似香港善德基金會尋日朝早喺香港仔郊野公園舉行遠足活動，吸引近千位善長仁翁參加，家庭與學校合作事宜委員會主席湯修齊（Henry）仲自爆，話以前太太懷孕嘅時候開始一齊去行山，順便胎教仲喺肚入面嘅囡囡，囡囡大個咗就愛上行山嘞！
Henry憶起其中一次行山嘅驚險時刻，囝囝同囡囡孭住背囊行得好快，猴子見到有嘢食，於是追住佢哋，喺呢個咁危急嘅關頭，Henry中途殺出，叫仔女鎮定啲，唔好郁，慢慢行，最後成功脫險。
「中國變形金剛之父」林亮都有參加今次活動，仲分享多年嚟行山嘅經驗，佢話五十幾年前佢由俗稱「兵頭花園」嘅香港動植物公園行上山頂「老襯亭」只用咗二十六分鐘，幾乎每次行山或者四周圍去旅行都會帶住隻塑膠鴨仔，佢形容老婆係第一位，鴨仔就係第二位，直頭當正佢係吉祥物，不離不棄。
基金會主席董吳玲玲同副主席洪光汜見到咁多善長參與覺得好開心。洪光汜話已經有廿幾年嘅行山經驗，就算平時幾忙都好，都會堅持做運動，佢就覺得今次參與基金會嘅遠足活動好有意思，因為可以幫到人，自己又開心。
鄒圳麗當係親子活動
至於總理鄒圳麗（Amy）已經連續兩年帶埋近五歲嘅囡囡嚟，當行山係親子活動。Amy話因為平時工作太忙，只能夠喺放假抽時間同囡囡出席朋友聚會。問到囡囡難唔難湊？佢就話唔會，因為囡囡好識得表達自己，而且佢仲會帶埋囡囡返工，咁樣可以一邊兼顧工作，一邊睇住佢畫畫，一舉兩得。
卓妮